Magneetskool - Monnas Webtuiste

HOËRSKOOL MONUMENT MAGNEETSKOOL VIR MUSIEK

Die Magneetskool vir Musiek het in 2003 tot stand gekom as 'n projek van die Gauteng Onderwysdepartement. Monument Magneetskool is een van slegs twee musiekskole in die D2-distrik. Die Magneetskool het die ou Musieksentrum vervang, met die doel om 'n breër deursnit van die gemeenskap te bedien. Sedert 2005 word die Monument Konservatorium gehuisves in die spoggerige nuwe klaskamers van die ou CP Koshuis in Eerstestraat.

Hier word tans sowat 180 leerders uit 25 voedingskole onderrig. Sewe voltydse onderwysers bied daagliks onderrig in klavier, klawerbord, viool, tjello, fluit, blokfluit, ligte- en klassieke kitaar, sang sowel as musiekteorie.

Elke leerder kry ook jaarliks die geleentheid om sy vordering te meet aan ‘n interne eksamen of selfs eksterne eksamens van Unisa, The Associated Board of the Royal Schools of Music (ABRSM) en Trinity College of London. Leerders word ook sterk aangemoedig om jaarliks aan Eisteddfods deel te neem.

Die Instrumentale Afdeling van die Segarona Kunstefees, wat deel vorm van die D2-distrik se kunsteprogram, word deur die Magneetskoolonderwysers gekoördineer en aan die einde van Julie by die konservatorium aangebied. Daar is ook vele ander optreegeleenthede vir die leerders in die vorm van oefenkonserte en gemeenskapsprojekte. Die hoogtepunt natuurlik ons jaarlikse Prestige Konsert in Oktober.

Verskeie uitstappies word elke jaar vir belangstellende en entoesiastiese leerders en hul ouers gereël. Vanjaar se eerste uitstappie vind reeds plaas op Saterdag 30 Mei met ‘n simfonie-uitvoering deur die Simfonia Juventi Jeugsimfonie-orkes in die gehoorsaal by Unisa.

Elke leerder ontvang jaarliks ‘n toekenning by die Magneetskool se Prysuitdelingsfunksie, gehou in Januarie van die daaropvolgende jaar. Verskeie spesiale toekennings word ook gemaak aan leerders wat besondere vordering getoon of prestasies behaal het. Die Top 10-leerders ontvang elkeen ‘n medalje.  Prestasiebeurse word aan die Top 3-leerders toegeken.

Musieksterre word vereer

Monnas se Magneetskoolleerlinge is op Donderdagaand, 21 Januarie vir hul musiekprestasies en harde werk van die afgelope jaar beloon.  Tydens die spoggeleentheid is 149 sertifikate, asook verskeie trofeë en beurse aan verdienstelike leerlinge toegeken.

Leerlinge van alle omliggende laer- en hoërskole word by die Magneetskool in ‘n verskeidenheid instrumente, asook musiekteorie onderrig.  In 2009 het leerlinge aan interne trapeksamens, eksterne praktiese sowel as teoretiese eksamens en kunswedstryde deelgeneem en uitstekend gevaar.  Nege leerlinge, waaronder vier Monnasleerlinge, verskyn op Unisa se ererol vir teorie eksamens.  Leerlinge moes 90% in dié eksamen behaal om te kwalifiseer vir die ererol.  Daarbenewens was van ons musieksterre deel van verskeie orkeste en ensembles en het bewys dat musiekmaak nie net bloedsweet en harde oefen is nie, maar ook groot pret kan wees!

Monnas is veral trots op ons eie musikante wat onder die Top 10-Magneetskoolleerders tel.  Baie geluk aan Simoné Botha, Bianca Auret en Natasha Auret met jul besondere prestasies.  Natasha Auret het ook ‘n prestasiebeurs van die Magneetskool ontvang.  Julle maak seker dat Monnas se kultuurhart vuurwarm aan die klop bly!

Daar is vanjaar 191 ingeskrewe leerlinge aan die Magneetskool verbonde.  Ons sien uit na ‘n jaar waarin vorige prestasies nie net oortref gaan word nie, maar waar die liefde vir musiek voluit beoefen gaan word.  Viva la Musica!